الجراج
عشفة ومساعدين

#الجراج | يعني إيه مساعد ووظيفته في العفشة؟

إلحقني يا أسطى.. العربية خفيفة في المطبات والمساعد ضارب زيت ومحجر
إهدى بس يا بيه كل ده مبيحصلش في وقت واحد، تعالى نفهم مع بعض إيه معنى كل حاجة من دول ووظيفتها وتعرفها امتى
المساعد عباره عن بستم بيتحرك جوه شميز
وما بينهم زيت أو غاز أو الإثنين
البستم بيضغط على الزيت اللى محبوس جوه الشميز اثناء انضغاطه بوزن السياره أو على المطب
البستم فيه فتحات صغيره بتسمح بمرور الزيت
كل ما الفتحات دى كانت اكبر او الزيت لزوجته اخف
كل ما كان المساعد سهل الحركه في الطلوع والنزول وده اللى بنسميه مساعد خفيف و طبعآ
الفتحات لو ضيقه او مسدوده او لزوجة الزيت عاليه فحركة الزيت اثناء مروره من الفتحات دى مع حركة المساعد في الطلوع والنزول بتكون بطيئه جدا وبالتالى البستم الداخلى والمساعد بيكون بطيئ جدا وتقيل جدآ
وده اللى بنقول عليه مساعد محجر
والمساعدين اللتى تعمل بالزيت فقط بتبقى خفيفه فى الطلوع والنزول وبكون المساعد طرى ومريح فى المطبات عفشه ناعمه بس الثبات أقل والعمر أقل
و المساعدين اللي بتشتغل بالغاز بس بتبقى تقيله فى الحركه وبتخلي مطب العربيه ناشف لان المساعد نفسه بيبقى ناشف

أفضل أنواع المساعدين:

المساعدين اللي تجمع ما بين الاتنين الزيت والغاز أو الزيت والهوا
مساعد غاز على زيت مساعد كويس وعمره معقول بالنسبه لشوارعنا،، وبتديك راحه فى المطبات وثبات على الطريق
طيب ازاي نعرف ان المساعدين بايظه وايه علامات بوظان المساعد

1 هتلاقى المساعد جايب زيت من فوق نتيجة مطب جامد فالأويلسيل الخارجى ضرب
2 المساعد خفيف تلاقى العربيه مع اى مطب وبخاصه مطبات الهوا قاعده تتمرجح
3 المساعد محجر هتلاقى العربيه بترزع مع اى مطب زى ما تكون راكب عربيه نقل مش ملاكي وناشفه جدآ ومبتخدش وتدي كدا
طيب ايه اضرار انى امشى بالمساعدين بايظين
اضرار كبيره جدا
1 عومان وعدم ثبات في السرعه
2 بتحس انك راكب مرجيحه مش عربيه
3 ممكن مطب جامد مع حمل تقيل يكسر سوسته لا قدر الله
ده شرح للمساعد وان شاء الله الشرح الجاي عن السوسته والبطاحه
تمنياتي لكم بالسلامه.

أحمد عبد الخالق

إترك تعليقك

أضف تعليقك